المرأة بين مطرقة التوقعات وسندان الذات
بقلمي نرمين بهنسي
أيسك.. زمان كانوا بيقولوا “البنت لازم تبقى ست بيت شاطرة”، دلوقتي بيقولوا “لا، لازم تكوني ناجحة وشاطرة ومستقلة ومبهرة… وكمان مبتغلطش”!
طب وهي فين من كل ده؟
المرأة طول عمرها عايشة بين مطرقة التوقعات اللي المجتمع بيحطها فوق دماغها، وسندان الذات اللي بيخليها تحس إنها مقصرة مهما عملت.
تشتغلي؟ هيقولوا إنتي مأثرة في ولادك.
تقعدي في البيت؟ هيقولوا ليه مش بتشتغلي وتحققي ذاتك؟
تهتمي بنفسك؟ يقولوا سطحية.
ماتركزيش على شكلك؟ يقولوا مهمِلة.
وفي وسط كل الآراء دي، بتلاقي الست نفسها تائهة… بتحاول ترضي الكل وتنسي ترضي نفسها.
المرأة مش محتاجة تبقى نسخة جاهزة من توقعات الناس.
مش لازم تبقي مثالية طول الوقت.
كفاية تكوني إنتي… بطريقتك، بحكايتك، بأخطائك، وبنجاحاتك.
خدي نفس عميق، وافتكري:
أنتي مش موجودة علشان تلبّي توقعات حد، أنتي موجودة علشان تحققي السلام جواكي قبل أي حاجة تانية.
