زحمة على بوابة القلب
بقلمي نرمين بهنسي
أيسم.. في لحظات معينة، بتحس الست إنها مش بس بتفكر، دي كمان بتحس، وبتعيش، وبتتوه بين كل ده.
الأفكار بتيجي زي سيل مش بينتهي، كل فكرة ماسكة في ديل اللي قبلها، وكأن العقل عامل مظاهرة جواها… وفي نفس اللحظة، المشاعر شغالة بطريقتها، لا بتستأذن ولا بتنتظر دورها.
تلاقيها قاعدة، شكلها عادي جدًا، بس جواها في دوشة. فكرة بتسأل: “إنتِ كويسة؟”، ومشاعر بترد: “لأ، إحنا تايهين!”، وأحلام بتطل من بعيد تقول: “طب تعالي نجرب حاجة جديدة”، وخوف بيشدها من هدومها: “اقعدي مطرحك”.
الزحمة دي مش ضعف، بالعكس… دي حياة.
اللي بيحس بزيادة هو اللي عايش بزيادة. اللي دماغه ماتهداش بسهولة هو اللي قلبه فيه مساحات كبيرة لسه ما استكشفتهاش.
مش عيب تبقي مش عارفة ترتبي أفكارك كل يوم، ولا عيب تبقي متلخبطة ما بين اللي نفسك فيه واللي خايفة تخسريه.
العيب الحقيقي إنك تطلبي من نفسك تكوني روبوت ما بيحسش، أو تحمليها فوق طاقتها لمجرد إنك عايزة تباني “كويسة” قدام العالم.
خدي نفسك.
اسمعي الزحمة دي بدل ما تحاربيها.
يمكن تلاقي في نص الخناقة دي فكرة منورة، أو مشاعر كانت محتاجة حضن، مش محكمة.
في النهاية… إحنا مش المفروض نعيش طول الوقت في نظام تام. أوقات الفوضى دي بتبني جوانا حد أجمل، حد أصدق.
