أمنية أنقى من الحب
بقلمي نرمين بهنسي
أحيانًا بنتمنى حاجات كتير في حياتنا: نجاح، سعادة، ارتباط، أو حتى علاقات جميلة تجمعنا بناس بنحبهم.
بس فيه أمنية أعمق من كل ده، أمنية بتحمي قلوبنا من الوجع الخفي: إننا ما نشوفش يوم خُبث قلوب ناس إحنا حبيناهم بصدق.
مش أصعب من إنك تحب حد، وتكتشف في لحظة إن القلب اللي كنت شايفه طاهر، مخبّي جواه غدر أو خيبة أمل.
الحب بيخلينا نصدق، نتغاضى، ونشوف الدنيا أجمل. والخُبث لما بيبان بعد الحب، بيوجع ضعف الوجع العادي، لأنه بيكسر الثقة اللي بنيناها بعيون بريئة.
عشان كده، لما تتمنى، ما تتمناش بس الخير أو النجاح.
اتمنى كمان إن ربنا يحفظ قلبك من صدمة الحقيقة المرة، وإنك تفضل شايف اللي بتحبهم بنفس النقاء اللي شفتهم بيه أول مرة.
يمكن مش كل الناس على نيتك، بس دايمًا تقدر تدعي إن ربنا يكفيك شر القلوب اللي بتضحك بوش، وبتخبي طعنات في الضهر.
وتفضل دايمًا تحب بسلام… وتحب بأمان.
