هي القمر في عزّ الغيم
بقلمي نرمين بهنسي
هي اللي بتضحك وعيونها بتخبّي وجع عمره ما اتقال.
كل اللي حواليها شايفينها قوية..
لكن محدّش يعرف إن قوتها دي معمولة من كتر الانكسارات.
تقوم كل يوم تلبس الفرح،
وترسم طاقة أمل على وشها كأن الدنيا ما حصلش فيها حاجة،
توزّع طبطبة، وتسند الكل،
وتنسي تسند نفسها.
تخبّي دموعها ورا كلمة “أنا بخير”،
وتخلي صوتها دايمًا هادي علشان ماحدش يسمع الصراخ اللي جواها.
هي مش مجرد بنت،
دي قصيدة صامتة،
مايفهمهاش إلا اللي قلبه حسّ بيها.
جواها حديقة يمكن مهجورة،
بس ريحتها لسه بتطبطب على قلوب كتير.
تتظاهر بالقوة مش علشان ما بتتعبش،
لأ… علشان ماحدش يشوفها وهي بتقع.
وفي كل لحظة بتقع فيها،
بتقوم تاني وتقول لنفسها:
“أنا لسه أقدر.. ولسه عندي شمس بتنور لوحدها.”
